Udushya kuri Album Yvan Buravan ateganya kumurika

0
98

Yvan Buravan nk’umwe mu bahanzi bamaze kubaka izina rikomeye mu muziki w’u Rwanda, ageze kure imyiteguro yo kumurika album ye ya kabiri izaba ikurikira iyo yamuritse tariki 1 Ukuboza 2018.

Iyi album ya kabiri ya Yvan Buravan nubwo yirinze gutangaza izina ryayo, yahishuye izaba iriho umwihariko w’indirimbo enye ziririmbye mu njyana yatangije mu rwego rwo kumenyekanisha umwimerere w’umuziki w’u Rwanda.

Iyi njyana avuga ko atarabonera izina, ahamya ko ari yo yonyine yatuma umuziki w’u Rwanda umenyekana mu gihe buri wese yafata undi ukuboko bagafatanya kuyubaka.

Akomoza kuri iyi njyana yanaririmbyemo indirimbo ‘Ye ayeee’ aherutse gusohora, ikaba iya mbere yagiye hanze mu ziri kuri iyi album ye nshya, Yvan Buravan yavuze ko ari umuziki ugezweho ariko uvanzemo n’umwimerere w’umuziki nyarwanda.

Ati “Kuva mu myaka yashize nari maze iminsi nkora umuziki utuje, ndashima ko abantu babikunze. Naricaye ndavuga nti reka ngire icyo nkora ku buryo kibaye cyiza cyaba intangiriro y’ikindi kinini cyane. Ndavuga kuvanga umuziki ugezweho ndetse n’umunyarwanda.”

Yvan Buravan yakomeje avuga ko yahisemo gutangiza uru rugendo kugira ngo umuziki w’u Rwanda ugire umwimerere, umuhanzi wo mu Rwanda nagira aho ajya kuririmba bijye byorohera buri wese kumenya aho akomoka.

Yongeyeho ko yatekereje gukora umuziki ufite umwimerere wo mu Rwanda, nyuma y’ibitaramo yakoreye mu bihugu bitandukanye yakoze amaze kwegukana irushanwa rya Prix Decouvertes.

Ati “Ni igitekerezo cyaturutse mu kugera ahantu hatari Abanyarwanda, nkabona uretse ko nababwiye ko ndi Umunyarwanda, biragoye ko bumva umuziki wanjye bakamenya aho nkomoka.”

Kuva icyo gihe nibwo Yvan Buravan yatangiye gutekereza uko hatangizwa urugendo rwo gushakisha ikirango cy’umuziki w’u Rwanda ku buryo umuntu azajya aririmba abantu bagahita bamenya aho akomoka.

Yvan Buravan avuga ko mu gihe abahanzi n’abakunzi b’umuziki bahagurukira rimwe bagatizanya imbaraga mu gukunda iby’iwabo, umuziki w’u Rwanda wagera ku rwego rwiza.

Ati “Nkuko n’ubundi igihugu muri rusange gitera imbere, […] ndifuza ko no mu muziki biba gutyo, umuntu yavuga ngo uno muziki ni uwo mu Rwanda abantu bakumva koko ko harimo itandukaniro.”

Mu kiganiro kirekire yagiranye na IGIHE, Yvan Buravan agaruka kuri album ye, yavuze ko azayisohorera ku mbuga zicururizwaho imiziki kuko ibihe turimo byo kwirinda ikwirakwira ry’icyorezo cya Covid-19 bitemerera abahanzi muri rusange gutegura ibitaramo.

Icyakora ku rundi ruhande uyu muhanzi yijeje abakunzi b’umuziki ko icyorezo nikigenza make azategurira abakunzi be igitatamo.

Ni Album Yvan Buravan avuga ko yahurijeho abahanzi bo mu Rwanda nubwo yirinze gutangaza amazina yabo.

Buravan yaherukaga gushyira hanze album ye ya mbere yise ‘The Love Lab’ mu gitaramo gikomeye, cyabereye muri Kigali Conference & Exhibition Village hahoze hitwa Camp Kigali, kuri uyu wa Gatandatu tariki 1 Ukuboza 2018.

Buravan mu gitaramo cye yafatanyije n’abahanzi barimo itsinda rya Active, Uncle Austin ndetse na Charly na Nina. Ni igitaramo cyitabiriwe ku rwego rwo ndetse abantu aba benshi kugeza ubwo bamwe bakurikiye igitaramo bahagaze kubera ko imyanya yarin yashize.

Yvan Buravan ari mu myiteguro yo kumurika Album ye ya kabiri izaba iriho umwihariko w’indirimbo zicuranze mu mudiho wa kinyarwanda

Sangiza abandi iyi nkuru

LEAVE A REPLY

Please enter your comment!
Please enter your name here