Dr Paul Gitwaza – Founder & International President of AWM//ZTCC

Umuyobozi wa Zion Temple Celebration Center ku Isi, Apôtre Dr Gitwaza Paul, yongeye guhanurira Afurika ibintu bitandukanye birimo ko igiye kuba igihugu kimwe kizaba gikomeye, icyo gihe Igiswahili kikazagira agaciro gakomeye kurenza izindi ndimi.

Ibi yabihanuye ubwo yasozaga igiterane cyitwa ‘‘Africa Haguruka’’ ku nshuro yacyo ya 22 cyabaye kuva ku itariki ya11 gisozwa ku wa 18 Nyakanga 2021.

Cyakozwe binyuze mu ikoranabuhanga bitewe n’imiterere y’icyorezo cya Covid-19. Cyitabiriwe n’abantu bari hirya no hino batanze inyigisho n’ibiganiro bitandukanye.

Ubwo cyasozwaga, Apôtre Dr Paul Gitwaza, yagejeje ku bitabiriye ubuhanuzi kuri Afurika burimo ubuvuga ko igiye guhinduka igihugu kimwe cy’igihangange.

Ati “Imyaka izagera ubwo Afurika itazaba yitwa Afurika ahubwo yitwa Leta Zunze Ubumwe za Afurika, aho izaba ari iguhugu kimwe cyigenga.”

Yahamagariye abantu kwiga Igiswahili

Muri ubu buhanuzi Dr Paul Gitwaza akomeza avuga ko Afurika izaba ifite imijyi itanu ikomeye mu mpande zose z’uyu mugabane kandi ko ururimi ruzaba ruhatse izindi ari Igiswahili.

Yagize ati “Ururimi rw’Igiswahili ruzamenyekana muri Afurika yose. Tuzakoresha Igifaransa n’Icyongereza nk’indimi zisanzwe ariko ururimi rw’Abanyafurika ruzaba ari Igiswahili. Afurika nimara kuba igihugu kimwe izaba ifite imijyi itanu ikomeye kurusha iyindi, umwe uzaba mu Majyaruguru, mu Majyepfo, Iburasirazuba, Iburengerazuba, undi uzaba hagati muri Afurika.”

Yakomeje asaba Abanyafurika ko batangira kwiga Igiswahili kuko kigiye kuba ururimi rukomeye ruzaba ruhenze mu bihe biri imbere.

Ati “Ururimi ruzaba rukomeye ni Igiswahili, nimutangire mucyige, mucyigishe n’abana kuko ni rwo ruzakoreshwa; abantu benshi bazatangira kucyiga, mutangire kitarahenda.”

Afurika izagira umutware umwe kandi azaba atinya Imana

Muri ubu buhanuzi Apôtre Gitwaza yavuze ko Afurika nimara kuba igihugu kimwe, izagira n’umuyobozi umwe kandi azaba atinya Imana cyane.

Yagize ati “Perezida wa mbere wa Afurika Yunze Ubumwe azaba akijijwe, atinya Imana kandi w’umunyabwenge bwinshi; azava mu gihugu kivuga Icyongereza muri Afurika, birumvikana azaba azi Igiswahili.”

Abanyafurika bajyanywe ari abacakara bazagaruka

Ubuhanuzi bwa Gitwaza buvuga ko Abanyafurika bose baba hanze yayo bazagaruka muri Afurika kugira ngo bubake igihugu cyabo, akaba yahamagariye abari hanze bose gutaha ngo bafatanye n’abandi.

Yagize ati “Tugiye guhanurira Abanyafurika bose aho batataniye kugira ngo batangire bitegure kugaruka iwabo. Ndababwira uyu munsi abari muri Amerika, Australia, u Bushinwa, Canada, u Bubiligi, u Bufaransa, Suède n’ibindi bihugu ngo nimutahe muze mwubake iwanyu muhakomeze.”

Kuri ubu usanga Abanyafurika baba bahangayikishijwe no gushaka ubwenegihugu bw’ibihugu byo ku yindi migabane, Aprotre Gitwaza yavuze ko bizahinduka ahubwo Afurika abe ari yo yifuzwa.

Ati “Igihe kizagera kwitwa Umunyafurika bibe ari iby’agaciro kuko bazaba bafite Imana ndetse abantu bazabyifuza. Abanyafurika benshi n’abayobozi babo bazatinya Imana.”

“Kugira pasiporo ya Afurika uzaba usa n’ufite ikibuye cya diyama cy’ama-carat icumi, ibi bizaba biterwa no kuba Imana izaba iri muri Afurika izamure igitinyiro cyayo gihari bizamure Abanyafurika.”

Sangiza abandi iyi nkuru

LEAVE A REPLY

Please enter your comment!
Please enter your name here