Minisiteri ya Siporo yemereye ikipe ya AS Kigali gutangira imyitozo yitegura umwaka mushya w’imikino wa 2021/22, aho izahagararira u Rwanda muri CAF Confederation Cup.

Kuva mu mpera za Kamena, byinshi mu bikorwa bya siporo byahagaritswe mu Rwanda kubera ubwiyongere bwa COVID-19 n’ingamba zitandukanye zafashwe mu gukumira ikwirakwira ry’iki cyorezo cyibasiye Isi.

AS Kigali yabaye iya kabiri muri Shampiyona y’umupira w’amaguru ya 2020/21, yasabye ko yatangira imyitozo hakiri kare, yitegura irushanwa Nyafurika rya CAF Confederation Cup.

Minisiteri ya Siporo ibinyujije muri FERWAFA, yayemereye gusubukura imyitozo ku wa 30 Nyakanga, ariko iyisaba gukomeza kubahiriza amabwiriza yerekeye kwirinda ikwirakwira rya COVID-19.

Iti “Dushingiye ku ibaruwa yanyu no 493/ferwafa/2021 yo ku wa 23 Nyakanga 2021, isabira AS Kigali uruhushya rw’umwihariko rwo gutangira imyiteguro ya CAF Confederation Cup 2021-2022 aho imikino izatangira muri Nzeri 2021.”

“Mbandikiye iyi baruwa ngira ngo mbamenyeshe ko MINISPOTS itanze ubwo burenganzira bwo gutangira imyitozo ku ikipe ya AS Kigali. Mu rwego rwo kwirinda COVID-19, turasaba ubuyobozi bw’ikipe gukurikiza amabwiriza yose y’ubuvuzi mu rwego rwo kurwanya iyandura n’ikwirakwira rya COVID-19, kutayubahiriza bishobora gutera isubikwa ry’imyitozo.”

Umunyamabanga Uhoraho muri Minisiteri ya Siporo, Shema Maboko Didier, yasabye FERWAFA kugenzura iyubahirizwa ry’amabwiriza yashyizweho.

AS Kigali yabaye iya kabiri inyuma ya APR FC izakina CAF Champions League, ni yo makipe azaserukira u Rwanda mu mikino Nyafurika y’amakipe mu mwaka w’imikino wa 2021/22.

Iyi kipe y’Abanyamujyi yaguze abakinnyi bashya batandukanye barimo Ntwari Fiacre (umunyezamu), Rukundo Denis, Rugwiro Hervé, Mugheni Kakule Fabrice, Buteera Andrew (yatiwe muri APR FC), Uwimana Guillain, Niyonzima Haruna na Niyibizi Ramadhan.

Siporo zemerewe gusubukura imyitozo ni izikorwa n’umuntu ku giti cye

Mu mabwiriza mashya Minisiteri ya Siporo yashyize hanze ku Cyumweru, tariki ya 1 Kanama 2021, yatangaje ko siporo yemerewe ari ikozwe n’umuntu ku giti cye, ikorewe hanze ategeranye n’abandi.

Ibikorwa by’imikino byemerewe gusubukura ni: Kwiruka, Imikino Ngororamubiri, kunyonga igare, imyitozo yo kugenda n’amaguru n’umukino wo gutwara imodoka.

Yatangaje kandi ko isomo ngororamubiri na Siporo ryemewe mu mashuli hubahirizwa ingamba zo kwirinda COVID-19.

Ku bakorera imyitozo kuri Stade Amahoro, Minisiteri ya Siporo yatangaje ko bizajya bikorwa hagati ya saa kumi n’ebyiri za mugitondo na saa kumi n’imwe z’umugoroba kandi bireba abakora siporo ku giti cyabo gusa.

AS Kigali yemerewe gutangira imyitozo yitegura CAF Confederation Cup
Minisiteri ya Siporo yatangaje ko siporo yemewe ari ikozwe n’umuntu ku giti cye

Sangiza abandi iyi nkuru

LEAVE A REPLY

Please enter your comment!
Please enter your name here