Umupfumu Rutangarwamaboko Modeste Nzayisenga n’umufasha we Umuziranenge Sana Cynthia, bakoze umuhango wo gutura igitambo cy’umuterekero abazimu b’i Rwanda, banashimira imana y’i Rwanda mu kwizihiza isabukuru y’imyaka ine bamaze barushinze.

Iki gikorwa cyabaye mu mpera z’icyumweru gishize aho bari kumwe n’abana babo babiri. Aba bombi bari bacanye umuriro bazana igaburo bateguye rigizwe n’umutsima w’amasaka n’inyama n’imboga z’isogi zigeretse ku bishyimbo. Hari kandi n’amazi y’amasaka, urwagwa mu ducuma n’amata mu nkongoro.

Mu gutura iki gitambo cy’umuterekero, baryaga ku mboga n’inyama n’umutsima w’amasaka maze bagashyira no muri wa muriro w’igicaniro.

Urwagwa Rutangarwamaboko yasomyeho arangije asuka muri wa muriro.. Amata yo bayahaye abana, bababwira bati “Mumywere mu kanwa kacu bazimu bacu batazima ni mwe tuyakesha.”

Rutangarwamaboko yavuze ko gukora uwo mugenzo ari ugukomeza gushima imana y’i Rwanda ku bw’uko ikomeje kubafasha mu buzima ndetse banasaba gukomeza kubaba hafi bagakomeza kugira ishya n’ihirwe.

Rutangarwamaboko yarushinze ku wa 30 Nyakanga 2017 mu birori byavugishije benshi byabereye mu Ntara y’Amajyepfo mu Bibungo bya Mukinga i Nyamurasa ho mu Karere ka Kamonyi ari na ho avuka.

Ubwo yizihizaga imyaka ine amaze arushinze, yabwiye IGIHE ko uyu munsi ari uw’amateka kuri we n’umuryango we.

Ati “Ni umunsi wabaye uw’amateka. Ni byo duhora tuzirikana. Ni igihe tuzirikana ko imana y’i Rwanda, abakurambere, imiryango n’inshuti batwubakiye. Ni yo mpamvu twatuye igitambo cy’umuterekero.”

Yavuze ko uko basukaga inzoga cyangwa bagashyira ibyo kurya muri wa muriro, uko umwotsi wacumbaga ariko igitambo cy’umuterekero cyari kirimo kigera ku bakurambere.

Umugore we, Umuziranenge Sana Cynthia , yavuze ko atari ubwa mbere bakoze iki gikorwa kuko buri mwaka bizihiza umunsi nk’uyu.

Ati “Umunsi twarushingiyeho twibuka amateka akomeye. Icya mbere mu rugo ni urukundo. Iyo mukundana, muhuje nta kintu cyabahangara. Kugira ngo ubone umuntu muzabana neza muri iki gihe biragoye.”

Rutangarwamaboko yagaye abakunze gukerensa ubukwe bashaka kwerekana ko ntacyo bumaze.

Ati “Kuvuga ko nta bukwe, nta myaka ijana ni ukuyoba no kutareba mu nzira z’ubuzima bushingiye ku muco. Nkanjye sogokuruza yamaze imyaka 104, ubwo navuga ko nta myaka ijana nshingiye ku ki ? Twebwe icyo dukora ni ukumenya ko tugomba kubaho. Kugira ngo urugo rurambe icya mbere ni ukumenyana nk’imiryango. Urwo rugo ruzabura kuramba gute ? urugo ni urwaguka. Urubyiruko ni rureke izo mvugo. Ijambo ryiza ni mugenzi w’Imana n’iribi na ryo rifite icyo rivuze.”

Rutangarwamaboko ni Umuyobozi Mukuru w’Ikigo Nyarwanda cy’Ubuzima Bushingiye Ku Muco, ni Umuganga wabyigiye akanabigiraho Umurage . Ni Umushakashatsi ndetse n’Inzobere muby’Umuco, Amateka, Imbonezabitekerezo ari yo Filozofiya n’Ubuzima bwa Muntu Bushingiye ku Myizerere, Imyumvire, Imitekerereze Imyitwarire ndetse n’Imigirire.

Rutangarwamaboko n’umugore we bamaze imyaka ine barushinze
Uyu mugabo ntabwo yemeranya n’urubyiruko rwihaye imvugo ngo nta bukwe

Src: Igihe

Sangiza abandi iyi nkuru

LEAVE A REPLY

Please enter your comment!
Please enter your name here