Francine Niyonsaba, Umurundikazi wari umugore wa kabiri wagiye utsindira ibihembo byinshi mu gusiganwa metero 800 mu mikino ngororamubiri, kimwe na mugenzi we, Caster Semenya wo muri Afurika y’Epfo wari uwa mbere, babwiwe ko imibiri yabo irekura imisemburo ikabije ya testosterone itajyanye n’iy’abandi bakinnyi bahangana na bo mu masiganwa y’Imikino Olempike.

Gusa byabaye ngombwa ko bahabwa andi mahitamo ari ko nanone, Francine Niyonsaba yongeye gusezererwa mu mikino Olempike iri kubera mu Buyapani.

Uyu Murundikazi yari yahawe amahitamo atatu kugirango yongere kwitabira imikino Olempiki.

Ayo mahitamo ni; Kwivuza akagabanya imisemburo yo, kujya gusiganwa mu marushanwa y’abagabo, cyangwa guhitamo isiganwa rindi ry’intera ndende cyane, aho amategeko n’amabwiriza atandukanye.

Niyonsaba yahisemo amahitamo ya gatatu ajyana n’ikipe ihagarariye u Burundi mu gusiganwa muri Metero 5,000 na metero 10,000.

I Tokyo ariko kuwa Gatandatu ushize, na none Niyonsaba yongeye gusezererwa ubwo yari arimo gusiganwa muri kimwe cya kabiri muri metero 5,000 ku ikosa rya tekiniki.

Abayobozi bavuze ko Niyonsaba ari we wiyirukanye mu irushanwa akandagira mu murongo utandukanya abasiganwa kandi ari ikosa.

Ibi byabaye ubwo yari atangiye gusiganwa muri metero 5000 (Bihwanye n’ibirometero bitanu).

Nk’uko Ibiro Ntaramakuru by’Abanyamerika bibitangaza, ngo ntiyamenye ko yakandagiye mu murongo kugeza ubwo yari arangije gusiganwa azi ko yabonye umudari.

Mu gihe Niyonsaba atigeze agaragara ko yungukiye muri uko gukandagira mu murongo, ahubwo bigaragara ko byamuhombeje, ntibyabujije ko bimwirukanisha.

Abahagarariye Imikino Olempike banze n’ubujurire bwe.

Niyonsaba w’imyaka 28 y’amavuko niwe wenyine witabiriye amarushanwa yo gusiganwa metero 800 wabonye umudari mu 2016 wari wabashije gusubira muri iyi mikino i Tokyo.

Yaba Semenya wari wabonye umudari wa zahabu, na Margaret Wambui wo muri Kenya wari wabonye umudari wa Argent na bo bari basezerewe kubera imisemburo ikabije bahita basezera iyi mikino.

Kimwe n’aba bagenzi be, Niyonsaba yiswe umugore akivuka nubwo mu mikurire ye yagiye akura atandukana n’abandi bagore.

Kuri we, avuga ko ibyo akorerwa ari ivangura kuko atari we wahisemo kuvuka agakura agenda arushaho kugira imisemburo ya kigabo.

Sangiza abandi iyi nkuru

LEAVE A REPLY

Please enter your comment!
Please enter your name here