Nyuma y’uko Arsenal itsinzwe na Chelsea, ku nshuro ya mbere mu mateka yayo ikamara imikino ibiri ibanza ya shampiyona nta ntsinzi ndetse itinjiza igitego, bamwe mu bafana bayo basabye ko umutoza Mikel Arteta yakwirukanwa mu gihe hari n’abatebya bakavuga ko ikwiye gutozwa na Perezida Paul Kagame.

Arsenal yaraye itsinzwe na Chelsea ibitego 2-0 mu mukino w’umunsi wa kabiri wa Premier League wabereye kuri Emirates Stadium ku Cyumweru.

Kuri ubu, iyi kipe y’i Londres iri ku mwanya wa 19 mu makipe 20 mu gihe yaherukaga mu makipe ashobora kumunuka mu mikino nk’iyi ubwo Premier League yatangiraga mu 1992.

Umusaruro mubi ifite, ukomeje kubabaza abakunzi bayo ndetse bamwe muri bo basabira umutoza Mikel Arteta kwirukanwa dore ko amaze gutsindwa imikino 20 muri 60 ya Premier League amaze gutoza kuva mu Ukuboza 2019.

Umwe mu bafana bayo yagize ati “Arsenal iracyari yayindi ntijya izamura urwego. Abakinnyi ntibazamura urwego. Umusaruro na wo ntuhinduka. Impamvu zo kugumana Arteta zishingiye ku cyizere gusa.”

Hari uwavuze ko igihe cyigeze ngo Arteta yirukanwe kuko ikipe itagishoboye gutsinda, kugarira ndetse no kurema uburyo bw’igitego.

Undi, we yabaye nk’utebya, asaba ko ikipe yahabwa Perezida Paul Kagame kugeza uyu mwaka w’imikino wa 2021/22 urangiye.

Ati “Muhe akazi Perezida w’u Rwanda kugeza ku mpera z’umwaka w’imikino.”

Abafana bavuze ibi mu gihe Perezida Kagame usanzwe ari umukunzi wa Arsenal kuva mu 1996, aherutse kunenga umusaruro ibona muri iyi minsi.

Nyuma y’uko itsinzwe na Brentford ibitego 2-0 ku munsi wa mbere wa Premier League, Perezida Kagame yanditse kuri Twitter ko abafana ba Arsenal badakwiye kumenyerezwa gutsindwa. Yavuze ko kandi abona hakwiye kubakwa ikipe ishoboye guhangana ku buryo n’iyo yatsindwa, byabaho nk’ibiyigwiririye.

Ubwo umukino wa Chelsea wari utangiye, umutoza Mikel Arteta yavuze ko afite icyizere ko niyongera kubona abakinnyi icyenda adafite kubera imvune n’uburwayi bwa COVID-19, umusaruro ushobora guhinduka.

Arsenal izasubira mu kibuga ku wa Gatatu, ikina na West Brom muri EFL Cup mu gihe muri Shampiyona, izakurikizaho Manchester City ku Cyumweru.

Iyi kipe y’i Londres ntirigera itsindira Manchester City iwayo kuva muri Mutarama 2015 ndetse yatsinzwe imikino umunani ya Premier League iheruka guhuza amakipe yombi.

Bamwe mu bafana ba Arsenal basabye ko Arteta yirukanwa igatozwa na Perezida Kagame
Igitutu gikomeje kwiyongera ku mutoza Mikel Arteta nyuma yo gutsindwa imikino ibiri ibanza ya Premier League

Ushaka kwamamaza Hamagara 0783285787

Sangiza abandi iyi nkuru

LEAVE A REPLY

Please enter your comment!
Please enter your name here