Akarere ka Nyagatare kemeye amakosa mu micungire y’abakozi arimo gutinda gukoresha ibizamini by’akazi no guhemba abakozi batakiri mu kazi, bikomeza kugenda bigaragara muri aka karere. Ni mu gihe hari ibyo kananiwe gusobanura mu mishinga y’ibikorwaremezo, Girinka n’ibindi.

Aya makosa yagaragajwe ubwo Akarere ka Nyagatare kitabaga Komisiyo Ishinzwe gukurikirana imikoreshereze y’imari n’umutungo by’igihugu, PAC, kuri uyu wa 21 Nzeri 2021.

PAC yagaragaje ko Akarere ka Nyagatare katinze gutangaza urutonde rw’abakandida bemerewe gukora ikizamini cyanditse karenzaho iminsi 55 bigeze igihe cyo gutangaza abakora ikizamini cy’ikiganiro ubukererwe bugera ku minsi 92 kandi bitagomba kurenza iminsi itatu y’akazi nyuma yo gutangaza amanota y’ikizamini cyanditse.

Aka karere kandi kanenzwe ko kamaze iminsi 322 kataratanga raporo y’ibizamini byatanzwe muri komisiyo ishinzwe abakozi ba leta.

Akarere ka Nyagatare kandi kahembye abakozi badakora bahembwa ibihumbi 721 by’amafaranga y’u Rwanda nyamara badaheruka mu kazi, aho umwe yari akoze amezi atanu, undi yari amaze amezi ane adakora.

Hagaragajwe kandi ko ubwo Umugenzuzi w’Imari yagenzuraga aka karere kari kataragaragaza gahunda yo kugaruza miliyoni zisaga eshanu z’amafaranga y’u Rwanda n’ubundi kari kahembye abakozi badakora nk’uko byari byaragaragajwe muri raporo y’Umugenzuzi w’Imari ya 2018/2019.

Umunyamabanga Nshingwabikorwa w’Akarere ka Nyagatare, yavuze ko ku bijyanye n’ubukererwe mu gutanga ibizamini no gutanga raporo ari ikosa bemera.

Agaruka ku cyabiteye, yavuze ko ari ubwinshi bw’abasabye akazi bwarenze ubushobozi bw’umukozi wari ubishinzwe.

Ati “Imyanya yose twari twashyize ku isoko yageraga kuri 30, abakandida basabye imyanya barenga ibihumbi 13 967. Icyo gihe twari dufite umukozi umwe ushinzwe. gutoranya abujuje ibisabwa byaratinze bituma kubahiriza iminsi iteganywa n’itegeko bidakunda. Gukosora abantu bose byabaye ikibazo no kubakoresha ikizamini cy’ikiganiro na bwo bari bakiri benshi.”

Depite Mukabalisa Germaine ati “Tuvuge ko gukosora byatinze ariko raporo mumaze kuyibona ni iki cyatumye muyimarana iminsi 322 mutayitanze aho igomba kujya?”

Umunyamabanga Nshingwabikorwa, Hategekimana Fred, yasubije ko umukozi wari ubishinzwe yabihaniwe aho yahawe igihano cyo kugawa.

Ku bakozi bahembwe amafaranga agera kuri miliyoni eshanu badakora, Gitifu yavuze ko na ryo ari ikosa bemera.

Ati “Navuga ko ari amakosa kubona abakozi bahembwa amafaranga agera kuri miliyoni eshanu badakora, bamwe bari abarimu bahagaritse akazi ntibandika basezera, ntibyahita bimenyekana. Gahunda yo kugaruza amafaranga irarimbanyije ku buryo hasigaye asaga miliyoni 1,2 Frw.”

Nubwo bimeze bityo, nyuma yo kugirwa inama n’Umugenzuzi Mukuru w’Imari ya leta, ikosa ryo guhemba abakozi badakora ryongeye kugaragara aho hari abahawe arenga ibihumbi 500 Frw yagaragaye mu 2019/2020.

Stade ya Nyagatare yagarutse muri PAC

Mu makosa yagarutse imbere ya PAC, Akarere ka Nyagatere kakoze harimo ayagaragaye mu gukora inyigo yo kubaka Stade ya Nyagatare ifite agaciro ka miliyari umunani z’amafaranga y’u Rwanda yasinywe mu 2018.

Imirimo yagombaga gusozwa mu 2019. Nyuma y’amezi abiri imirimo yakiriwe by’agateganyo byagaragaye ko nta buryo bwo kuyobora amazi bwateganyijwe bigatuma yangiza imirima y’abaturage, hakiyongeraho ko yubatswe nabi ku buryo yari yatangiye kwiyasa.

Umunyamabanga Nshingwabikorwa w’Akarere ka Nyagatare, Hategekimana Fred, yavuze ko yemeranya n’ibyo Umugenzuzi w’Imari yabonye ariko ko ku bufatanye na LODA hari gukosorwa amakosa yakozwe harimo no gukora umuyoboro wa kilometero imwe uvana amazi muri Stade ukayamena mu mugezi w’Umuvumba.

Akarere ka Nyagatare kabajijwe ku masezerano avuguruzanya mu mushinga wo kubaka umuyoboro w’amazi mu Mujyi wa Nyagatare afite agaciro ka miliyoni zisaga 300 z’amafaranga y’u Rwanda.

Ukuvuguruzanya kugaragara ku gihe cyo gutangira imirimo, intera yagombaga kubakwa, kunanirwa gukosora ibyangiritse n’ibindi.

Hari n’ibijyanye n’isoko ryo gutegura ingemwe zo gusimbura ibiti byumye ryakozwe ku gipimo cyo hasi nyamara ryari ryatwaye miliyoni 707 Frw aho igenzura ryakozwe mu 2019/2020 ryagaragaje ko rwiyemezamirimo yari yarishyuwe nyamara ibiti byatewe byari byarumye ntibyasimburwa.

Imihanda yubatswe igahita yangirika nyuma y’igihe gito

Ibi byagaragaye mu masezerano yo gusana umuhanda Nyagasharara-Gikundamvura, yashyizweho umukono mu 2018. Ni umuhanda wa kilometero eshatu wo mu Murenge wa Karama ufite agaciro ka miliyoni 85 z’amafaranga y’u Rwanda.

Nyuma y’amezi arindwi wakiriwe by’agateganyo basanze warangiritse cyane kubera kutagira inzira z’amazi mu gihe byari biteganyijwe mu isoko.

Umuhanda wo mu Murenge wa Tabagwe wari ufite agaciro ka miliyoni 103 Frw, nyuma y’amezi ane imirimo yakiriwe by’agateganyo abagenzuzi basanze harangiritse, hari igice kitakozwe kandi biri mu masezerano.

Mu gusana umuhanda Kagitumba-Kiyovu-Kabeza-Byimana w’ibirometero bitanu wa miliyoni 57 Frw na ho harimo ibibazo aho nyuma y’amezi atandatu ibikorwa byakiriwe byari byarangiritse ndetse hari igice kidakoze nyamara harishyuwe hafi 94 % by’agaciro k’amasezerano.

Hategekimana yasobanuye ko iyi mihanda irimo iyakozwe n’abaturage bakoresha amaboko kandi nta bundi buryo bwari buhari bwo gukora imiyoboro ikomeye.

Mu nka zatanzwe muri gahunda ya Girinka nyinshi zarapfuye kimwe n’amatungo magufi

Inka zirenga 20 zapfuye nyuma y’igihe kiri hagati y’iminsi 17 na 366 zitanzwe ntibyagaragazwa niba Akarere karazisubije abaturage.

Hari abaturage bahawe inka 436 zifite agaciro ka miliyoni 151 mu 2018, muri izo 53 zapfuye mu gihe cy’iminsi iri hagati ya 12 n’amezi atandatu, ubwishingizi bwishyuye 38 izindi ntizishyurwa.

Mu nka 925 zatanzwe kuva gahunda ya Girinka yatangira zarapfuye, nta nyandiko igaragaza niba zari zifite ubwishingizi cyangwa zarishyuwe.

Ikindi ni uko muri gahunda yo gutanga amatungo magufi mu 2018 na 2019, mu ihene 576 zatanzwe, 382 zarapfuye.

Hategekimana yavuze ko bagerageje gushumbusha abaturage bari bahawe inka zigapfa bigakorwa ku bufatanye na ’Reserve Force’ bari bafitanye amasezerano yo gutanga izi nka, ku buryo izisigaye zitarishyurwa ari nke.

Ku bijyanye n’ihene zapfuye, yavuze ko ari izari zaratanzwe mu Murenge wa Kiyombe ahaba imbeho nyinshi zinanirwa kuyihanganira.

Depite Bakundufite Christine ati “Ubwo amakosa turashyira ku ihene zapfuye, ku karere cyangwa ku bagenerwabikorwa bagiye kuzifotorezaho nyuma y’iminsi mike bakaba barazibuze?”

Mukabalisa Germaine ati “Ubu barashaka kutubwira ko muri Kiyombe ari ahantu mu Rwanda hadashobora kuba ihene. Niba bazi ko zitahaba kubera iki baziguze bakazijyanayo?”

Hategekimana yavuze ko ari ikosa ry’ubuyobozi kuko iyo bakurikirana neza aya matungo yari gutanga umusaruro.

Raporo y’Umugenzuzi w’imari yanagaragaje andi makosa mu Karere ka Naygatare ahari abantu basinya kuri konti y’Akarere kandi atari abakozi bako, ibibazo byo gukata amafaranga abakozi ariko ntamenyekanishwe muri RSSB na RRA.

Hari n’aho Akarere ka Nyagatare kagiye gutira amasezerano mu ka Huye yo gucanira abaturage; ubwo ubuyobozi bwako bwabazwaga impamvu butubahirije amategeko agenga amasoko ya leta, basubije ko byihutirwaga kubera abayobozi bakuru b’igihugu biteguraga gusura aka karere.

Abagize PAC ubwo bakiraga ibisobanuro by’Akarere ka Nyagatare ku bibazo byagaragaye muri raporo y’Umugenzuzi Mukuru w’Imari ya Leta ya 2019/2020

Sangiza abandi iyi nkuru

LEAVE A REPLY

Please enter your comment!
Please enter your name here