Perezida Paul Kagame yasobanuye impamvu afata ibyemezo bikomeye ndetse benshi mu ntangiriro baba babona nk’ibitazatanga umusaruro, nko gufatanya n’amakipe nka Arsenal FC na Paris Saint-Germain, kwita ku ngagi zo mu birunga, kubaka imiturirwa yakirirwamo inama, gukoresha drones n’ibindi.

Yabitangaje mu kiganiro yari yatumiwemo na Dr. Fred Swaniker, Umuyobozi wa African Leadership University, cyiswe The Pathway, gitumirwamo abayobozi batandukanye ku Isi ngo bagire inama urubyiruko inzira rwacamo ngo ruziteze imbere. Cyabaye kuri uyu wa 20 Nzeri 2021 muri Kigali Convention Centre.

Uyu mugabo wamenyekanye cyane kubera guhirimbanira urubyiruko rwa Afurika abinyujije mu bikorwa birimo gutangiza Kaminuza ya African Leadership University, yabajije Perezida Kagame ibibazo bitandukanye birimo n’impamvu afata ibyemezo bigoye.

Dr. Fred Swaniker ahereye ku iterambere u Rwanda rumaze kugeraho mu bijyanye n’ubukungu rubikesha ibyemezo Perezida Kagame afata nko kwiyemeza kwita ku ngagi, cyangwa gutera inkunga amakipe akomeye i Burayi, yamubajije impamvu afata ibyemezo nk’ibyo mu gihe abandi baba batabyizera, ndetse n’uko abigenza ngo abo bantu batabyizera babibyaze umusaruro.

Perezida Kagame yamubwiye ko amateka u Rwanda rwagize ari ryo zingiro ryabyo, kuko ubwo u Rwanda rwabohorwaga mu 1994, cyari igihugu gikennye kidafite abaturage kuko hafi kimwe cya kabiri cy’abari batuye igihugu bari bapfuye abandi baravuye mu byabo, ndetse n’abasigaye bahora mu gahinda.

Yerekanye ko kuyobora no guteza imbere igihugu nk’icyo kitari gifite abantu, ndetse n’abo gifite barataye icyizere atari ibintu byoroshye byasabaga gutekereza kure, no gushakisha inzira zose zishoboka ngo ukizahure.

Yagize ati “Tumaze kubohora u Rwanda n’ibi bibazo byose, umuntu yari yashobewe akibaza ati ndahera hehe? Ndakora iki? Nta bushobozi mfite, nta bantu mfite, n’abo mfite buri wese ari mu kababaro, ntazi aho ahera. Ibyo bigatuma abantu batangira kwitana ba mwana, umwe agatekereza ko ikibazo afite yagitewe na mugenzi we.”

Yakomeje avuga ko kugira ngo hirindwe ko habaho kwihorera mu gihugu, ngo abantu basubiranemo, hagombaga gushyirwaho uburyo bushya bwo gukoramo ibintu, binyuze mu gushyiraho umutekano uhamye, n’inzira ziganisha igihugu ku iterambere.

Yagize ati “Twagombaga gushaka inzira yo guhunga ibyo bintu, hari hakenewe ibitekerezo byihariye by’uburyo twabivamo, tugashaka ubundi buryo dukoramo ibintu abantu batamenyereye yaba twebwe cyangwa se ababireberaga hanze. Sinavuga ko hari ubufindo bwakoreshejwe. Twakoze icyashobokaga nk’abantu.”

Perezida Kagame yerekanye ko ibyo ibyagezweho n’Abanyarwanda ari byo bishatsemo kuko nta shuri bagiye kubyigamo. Yavuze ko n’iyo umuntu yaguha ibyo ukeneye byose, hari ikintu ugeraho ari uko na we ushyizeho akawe.

Yavuze ko abanyarwanda batahisemo inzira mbi yo kugengwa n’amarangamutima nyuma ya Jenoside yakorewe Abatutsi ahubwo bagahitamo inzira yo kwishakamo ibisubizo, aribyo byabaye imbarutso y’ibyo benshi batangarira kuri ubu.

Perezida Kagame yagaragaje ko amateka Abanyarwanda banyuzemo byari ngombwa ngo hafatwe ibyemezo bigiye bitandukanye kandi bikomeye

Sangiza abandi iyi nkuru

LEAVE A REPLY

Please enter your comment!
Please enter your name here