Ikigo cya gisirikare cyagabweho igitero hapfa babiri

Guverinoma ya Burkina Faso yatangaje ko ku Cyumweru tariki 11 Nzeri 2022, hari abantu bitwaje intwaro bagabye igitero ku kigo cya gisirikare giherereye mu gace ka Deou mu Karere ka Sahel, gihitana abasirikare b’iki gihugu babiri.

Amakuru dukesha Ijwi ry’Amerika avuga ko uretse aba basirikare ba Leta bapfuye, bagenzi babo nabo babashije kwivugana 10 muri aba barwanyi babagabyeho igitero, ndetse babaka zimwe mu ntwaro bari bafite na moto bagendagaho.

Igisirikare cya Burkina Faso kivuga ko aba barwanyi baje bashaka kwinjira mu kigo, haba imirwano yo kubakumira ari nayo yaguyemo aba basirikare.

Uretse abasirikare ba Leta bakomeretse, ubuyobozi bw’ingabo muri iki gihugu buvuga ko abandi basaga 10 bakomeretse.

Iki gitero gikurikiye ibindi biheruka kuba mu ntangiriro z’uku kwezi. Muri ibi bitero hapfuye abasivile 35 n’abandi 37 bakomeretse igihe igisasu cyatezwe mu muhanda cyaturitsaga imodoka hagati y’umujyi wa Djibo na Bourzanga.

Abasirikare babiri ba Burkina Faso baguye mu gitero cyagabwe ku kigo cya gisirikare giherereye i Deou

SRC: Igihe.com

Leave a Comment

Your email address will not be published.