Ukraine: Uko ubuzima bumeze mu mujyi wa Izyum wambuwe Uburusiya

Ukraine war

Ku wa mbere, Perezida Volodymyr Zelensky yazamuye ibendera rya Ukraine mu mujyi abasirikare b’iki gihugu baherutse kubohora wa Izyum mu burasirazuba.

BBC yahasuye nyuma yaho gato isanga ari umujyi utagira umuriro w’amashanyarazi (cyangwa umuyagankuba mu Kirundi) n’amazi, ariko wiruhutsa kubera kuhagera kw’abasirikare ba Ukraine.

Uko urushaho kwegera Izyum, ni ko urushaho kubona ibimenyetso by’ukuntu abasirikare b’Uburusiya bahavuye byihuse.

Abasirikare ba Ukraine bateraniye ku nkengero y’umuhanda hafi y’uyu mujyi, bagenzura ibyo abasirikare b’Uburusiya batakaje muri iyi ntambara, ari na ko bamwenyura.

Hari ibifaru bibiri by’Uburusiya byatawe – ibendera rya Ukraine ryamaze kuzamurwa kuri kimwe muri byo. Abasirikare barahoberana bishimira intsinzi hano, mu gihe bagerageza gukoresha igifaru kimwe mu gukura ikindi mu muferege.

Mu mujyi nyirizina, ikindi gifaru cyatawe kiri hagati mu muhanda – nk’ikirango cyo gutsindwa kw’Uburusiya. Umugabo wa hano acyifotorejeho yifata ifoto ya ’selfie’ akoresheje telefone igezweho, yereka iki gifaru ibikumwe by’ibiganza bye bireba hasi nk’ikimenyetso cyo gutsindwa kw’Uburusiya.

Abagore babiri bavuye mu modoka nto yo mu bwoko bwa ’van’ (ivani), bafite imizigo mitoya mu ntoki, irimo n’imboga.

Larissa, w’imyaka 61, n’inshuti ye Victoria, ubu ni bwo bwa mbere bagarutse muri uyu mujyi.

Larissa avuga ko bahavuye mu ntangiriro y’intambara kandi ko bishimiye kuba bahagarutse.

Ariko ibintu biragoye, kuko urugo rwe ruri rwagati muri uyu mujyi rwarangiritse. Nyuma yo kuganira natwe, bagiye n’amaguru ngo babane n’inshuti zabo.

Mu kuzenguruka muri uyu mujyi, turabona inyubako nyinshi zarashweho zigahinduka umukara.

Hakurya y’umuhanda uvuye ku nyubako yangiritse y’ubutegetsi bw’umujyi, abantu babarirwa mu icumi bahagaze ku murongo bacecetse mu mvura irimo kugwa mu masaha ya nyuma ya saa sita z’amanywa bategereje imfashanyo, irimo nk’ibikombe birimo imboga, ibicuruzwa byumishijwe hamwe n’amazi yo kunywa yo mu macupa.

Uyu mujyi nta mazi yo mu nzu ufite, nta muriro w’amashanyarazi cyangwa uburyo bwo gushyushya mu nzu.

Abapfuye baracyarimo kubarwa hano, ariko abategetsi ba hano mu kwezi kwa gatatu babonye abantu 47 – barimo n’abana – bishwe n’igisasu cyarashwe n’indege ku nyubako y’amagorofa atanu yo guturamo. Icyo gitero cyasize umwobo munini hagati muri iyo nyubako.

Kuri iyi nyubako uyu munsi, turabona neza imbere muri bimwe mu byumba byayo. Hari televiziyo iri ku meza mu cyumba cyo mu igorofa ryo hejuru. Mu magorofa macyeya munsi yaho, imyenda iracyanagana neza mu kabati ko kuyibikamo, nkaho nyirayo ashobora kuzongera kuyambara.

Abagore batatu barimo kumwenyura mu ifoto yo muri ’album’ ntoya iri hasi mu byangiritse.

Tatiana, w’imyaka 69, wabaye muri iyi nyubako mu gihe cy’imyaka 22, arerekana ibaraza rye ryahiye igice kimwe ku igorofa rya kabiri.

Avuga ko icyo gitero cyabaye ari mu gitondo. Ntiyari ari hano kuko yari yagiye kwihisha.

Avuga ko abaturanyi bari bihishe muri iyi nyubako yo guturamo birundiye hamwe mu gice cyo hagati kugira ngo bagire ubushyuhe. Igisasu cyarashwe n’indege cyakubise rwagati muri iyi nyubako.

Hanze y’inyubako y’ubutegetsi muri uyu mujyi – yakoreshwaga n’abasirikare b’Uburusiya nk’ikigo cyo kuyoboreramo urugamba – ikimenyetso cy’Uburusiya kiracyanagana ku muryango, ariko ibendera ry’Uburusiya ryahiye ryajugunywe aho gushyira imyanda.

Muri iyi nyubako, mu biro harimo amasanduku anyanyagiye. Kuri stasiyo ya polisi iri hafi hano – aho Abarusiya bafungiraga abantu muri za kasho – tuhasanze ibirundo by’inzandiko z’inzira (passports) za Ukraine.

Polisi ikorera hano ivuga ko izo ’passports’ zari zaratwawe n’Abarusiya mu mezi bamaze barigaruriye uyu mujyi.

BBC

Leave a Comment

Your email address will not be published.