Kimisagara: Umugabo yapfiriye mu bwiherero

Umusaza witwa Gafaranga Pierre uri mu kigero cy’imyaka 70 wari utuye mu Murenge wa Kimisagara, Akarere ka Nyarugenge, yagiye mu bwiherero ahita apfiramo.

Kuri uyu wa Mbere tariki ya 19 Nzeri 2022, nibwo uyu musaza usanzwe ukora akazi ko kudoda inkweto yapfiriye mu bwiherero mu buryo butunguranye.

Umunyamabanga Nshingwabikorwa w’Umurenge wa Kimisagara, Kalisa Jean Sauveur, yabwiye IGIHE ko amakuru y’urupfu rw’uwo musaza bayamenye mu rukerera rwo ku wa Mbere.

Yavuze ko uyu mugabo yari mu kigero cy’imyaka 70 ndetse yari yaratandukanye n’umugore we uretse ko babaga mu rugo rumwe.

Yagize ati “ Byabaye mu rukerera uretse ko yari umuntu utishoboye wari unafite indwara nk’iy’umutima ku buryo ishobora kuba ari yo yamwishe.”

Yakomeje avuga ko uyu musaza akimara gupfa abakozi b’Urwego rw’Ubugenzacyaha RIB bahise bahagera bakora iperereza barangije bahita baha uburenganzira umuryango we bwo kumushyingura.

Leave a Comment

Your email address will not be published.