Kuri uyu wa gatanu haratangira irushanwa rya Made in Rwanda Cup 2022 ryateguwe na RSB ifatanyije na FERWAFA ryitabirwa n’amakipe 4 arimo na Rayon Sports.

Ikipe ya Rayon Sports ifite abafana benshi mu Rwanda yahawe umwihariko kuko mu mafaranga azinjira izahabwa 30%.

Amakipe azitabira iri rushanwa, aragabana amafaranga yavuye ku kibuga ndetse akaba ari nayo mafaranga azazitunga muri iki gihe cy’imikino.

Ku munsi wa mbere w’imikino amafaranga azava ku kibuga, Rayon Sports izatwara 30% Kiyovu Sports itware 27% naho Mukura victory sports na Musanze FC buri imwe itware 21.5%.

Ku mukino wa nyuma ikipe zageze ku mukino wa nyuma buri kipe izatwara 30% by’amafanga yavuye ku kibuga, naho amakipe yahataniye umwanya wa gatatu buri kipe itware 20%.

Kuri uyu wa gatanu kuva ku isaha ya saa 16:00, Kiyovu Sports irakina na Mukura victory sports, naho kuva ku isaha ya 19:30 Rayon Sports ikine na Musanze FC imikino yose irabera kuri sitade ya Kigali i Nyamirambo.

APR FC yari yatumiwe muri iyi mikino ariko yavuze ko itayitabira kubera imikino y’ibirarane muri shampiyona ifite.

  Amategeko azakurikizwa ni aya Ferwafa

Muri ‘Made in Rwanda Cup 2022’ hazakurikizwa amategeko asanzwe agenga amarushanwa ategurwa na Ferwafa.

Muri iri rushanwa hazifashishwa abakinnyi basanzwe bafite ibyangombwa bibemerera gukina, abanyamahanga ni batanu bemewe kujya ku rutonde rw’abakinnyi 18.

Amakipe yemerewe gukoresha abakinnyi bashya bayinjiyemo nk’abigenga [free agent] kuko itegeko ryemera ko basimburanya amakipe nyuma y’ifungwa ry’isoko ry’igura n’igurisha.

Aha nko muri Kiyovu Sports, izemererwa gukinisha myugariro Nsabimana Aimable uheruka kuyerekezamo nyuma yo gutandukana na APR FC.

  Ibiciro ni ibisanzwe

Kwinjira ku mikino ya ‘Made in Rwanda in Rwanda Cup 2022’, umuntu azasabwa kwishyurira rimwe hanyuma arebe imikino yombi.

Itike ya make yashyizwe ku 2000 Frw ahasanzwe, ahasakaye ni 5000 Frw mu gihe VIP ari 20.000 Frw.

  Ibihembo bizatangwa

Ikipe izegukana igikombe cya ‘Made in Rwanda Cup 2022’ izahabwa miliyoni 5 Frw, iya kabiri ihabwe miliyoni 4 Frw, mu gihe iya gatatu izahabwa miliyoni 3 Frw mu gihe iya kane izatahana miliyoni 2 Frw.

Irushanwa ryitiriwe Made in Rwanda rizakinwa hakorwa ubukangurambaga bugamije gushishikariza abaturarwanda gukunda ibikorerwa iwabo no guharanira ko biba byujuje ubuziranenge.

‘Made in Rwanda Cup 2022’ yateguwe na RSB muri gahunda yo kwizihiza Ukwezi k’Ubuziranenge, kuri kwizihizwa hakorwa ibikorwa bitandukanye ku wa 14 Nzeri-14 Ukwakira 2022.

Iri rushanwa rya “Made in Rwanda” n’ubwa mbere ribaye ndetse ibiciro byo kwinjira bihera kuri 2000 FRW mu myanya isanzwe.

Leave a Reply

Your email address will not be published. Required fields are marked *