Mu kiganiro Imvo n’Imvano yo kuri uyu wa gatandatu tariki 14 z’ukwa 10 mu 2023, turakomeze kuvuga ku mirwano yongeye kubura mu turere twa Masisi na Rutshuru aho ni mu ntara ya Kivu y’amajyaruguru muri Repubulika ya Demokarasi ya Congo.
Iyo mirwano iri guhuza imitwe yitwaje ibirwanisho yiyise Wazalendo, bivugwa ko ishyigikiye leta ya Kinshasa, hamwe n’umutwe wa M23 bivugwa ko ushyigikiwe n’u Rwanda nubwo leta y’u Rwanda ibihakana.
Iyi mirwano imaze gutuma abantu babarirwa mu bihumbi birenga 50 bakurwa mu byayo ubu bakaba babayeho nabi kuko bigoye imiryango ifasha kubatabara. Igisirikare cya Congo kirahakana ko kitari muri iyo mirwano.
Mwitangazo cyasohoye kw’itariki ya 1 z’uku kwezi kwa cumi, umuvugizi wa FARDC mu ntara ya Kivu y’amajyaruguru, Lieutenant Colonel Ndjike Kaiko Guillaume avuga ko igisirikare cya Congo kigitsimbaraye kw’ihame ryo kubahiriza amasezerano y’abakuru b’ibihugu byo mu karere yasinyiwe i Luanda n’i Nairobi, agisaba guhagarika imirwano.
Ariko mw’itangazo umutwe wa M23 wasohoye kuri uyu wa kabiri, uravuga ko ingabo za Congo zohereje ku mugaragaro abasirikare bazo i Kitchanga kandi ko bari gukorana n’ingabo z’u Burundi zagiye kuhacungera umutekano mu rwego rw’ingabo z’umuryango w’Afrika y’Uburusirazuba.
Izi mpande zombi kandi ziraregana k’ubwicanyi bwakorewe abaturage muri groupement ya Gisigari muri territoire ya Rutshuru.
Iyi mirwano yubuye nyuma y’agahenge kari kamaze amezi arenga 9 kuva aho iyi mitwe yitwaje ibirwanisho yasinye amasezerano yo guhagarika imirwano mu kwezi kwa 11 k’umwaka ushize i Nairobi muri Kenya.
Imvo n’Imvano rero igiye kubaza icyatumye iyi mirwano yubura.
Imvo n’Imvano kandi irabaza umuti watuma iyi mirwano ihagarara burundu.
Ese M23 irasaba iki cyananiranye kugirango ishyire intwaro hasi ?
Ese abazalendo bo barashaka ko M23 yakora iki kugirango basubize inkota mu rwubati ?
Abatumire bacu ni Karemera Canisius, umuvugizi w’umutwe wa M23, Sendugu Museveni wo muri Pareco y’aba Wazalendo, Olivier Kanyejomba wo muri Nouvelle Société Civile Congolaise (NSCC) , y’i Masisi hamwe na David Karambi ukuriye Communaute y’Abatutsi mu ntara ya Kivu y’amajyaruguru.