Imyaka igiye kuzura 10 Ingabo z’u Rwanda zigeze muri Repubulika ya Centrafrique mu bikorwa byo kubungabunga umutekano. Kuva icyo gihe zakoze uko zishoboye ngo zigarure ituze ry’abaturage b’iki gihugu nyuma y’intambara z’urudaca zadutse mu 2012.

Ingabo z’u Rwanda zagiye gutanga umusanzu muri iki gihugu, ubwo imitwe yitwaje intwaro mu majyaruguru yishyize hamwe ikarema umutwe witwa Séléka, utegura ‘coup d’état’ ariko ntibyawuhira.

Zageze muri iki gihugu cyo muri Afurika yo Hagati, mu ntangiriro za 2014 mu butumwa bwari ubw’Umuryango wa Afurika Yunze Ubumwe, MISCA.

Nyuma y’amezi make bwarahindutse, zitangira kubarizwa mu butumwa bwa Loni, Minusca aho zuzuza inshingano zirimo kurinda abasivile, ibikoresho bya Loni, kurinda Umukuru w’Igihugu n’umuryango we, urugo rwe n’ibindi.

Mu 2020, u Rwanda rwohereje muri Centrafrique izindi ngaho binyuze mu masezerano hagati y’ibihugu.

Umuvugizi w’Ingabo z’u Rwanda, Brig Gen Ronald Rwivanga, yasobanuye ko kuva Ingabo z’u Rwanda zagera muri iki gihugu, ibintu byahindutse.

Mu kiganiro na IGIHE, yagarutse ku byakozwe n’abasirikare b’u Rwanda bari mu butumwa bwa Loni, hamwe n’abandi boherejwe mu 2020 binyuze mu masezerano impande zombi zagiranye.

Brig Gen Rwivanga yabigarutseho ubwo itsinda ry’abanyamakuru ryaturutse mu Rwanda ryasuraga ishuri riri mu Mujyi wa Bangui ryasanwe n’Ingabo z’u Rwanda mu gace ka Kina.

Brig Gen Rwivanga Ronald yavuze ko usibye kurinda umutekano, Ingabo z’u Rwanda zigira n’uruhare mu kubaka ibikorwaremezo

IGIHE: Mugereranyije n’uko byari bimeze Ingabo z’u Rwanda zitaraza aha, ubu umutekano umeze ute?

Brig Gen Rwivanga: Amashuri yaratangiye. Iri shuri twasuye ryitwa Kina Primary School, riba muri Troisième Arrondissement ya Bangui. Rifite abanyeshuri barenga 2400.

Ni abanyeshuri benshi cyane. Iri n’ayandi yaratangiye. Ibi bigaragaza ko abaturage bohereza abana babo mu mashuri. Umutekano ni wose.

Ntabwo tureba umutekano muri rusange ngo duhangane n’umwanzi gusa, ahubwo tureba n’ibindi bibazo bijyanye n’umutekano rusange n’imibereho y’abaturage.

Twubaka ibigo nderabuzima bitandukanye, hari ibigo ababyeyi babyariramo bitatu tumaze kubaka, hari n’ibindi bikorwa by’umuganda, byose turabikora cyane.

Ingabo z’u Rwanda ziri mu butumwa bwa Loni hamwe n’izoherejwe mu masezerano y’ubufatanye hagati y’ibihugu, zikorana zite?

Ingabo za Loni zo zirenga 2000, ariko zifite gahunda ya Loni yo kurinda abaturage, guhagarika amakimbirane hagati y’abarwana n’ibindi.

Ingabo ziri mu butumwa bw’ubufatanye hagati y’ibihugu byombi [ni 1200], ni ukuvuga u Rwanda na Repubulika ya Centrafrique, zaje zije guhagarika ingabo za François Bozizé zari zaraje gutera mu Mujyi wa Bangui mu 2020.

Gusa zagumye hano kugira ngo zicunge umutekano w’abaturage n’uw’ingabo z’abari mu bikorwa byo kugarura amahoro kuko na bo bari babangamiwe icyo gihe. Urumva bakomeje mu kazi.

Ikindi cyiyongereye mu kazi kabo ni ukubaka ubushobozi bw’ingabo za Repubulika ya Centrafrique. Icyo ni cyo turimo, ni na cyo muzanareba ejo mu muhango wo gusoza amasomo ya gisirikare ya mbere y’abasirikare barenga 500 ba Repubulika ya Centrafrique.

Gahunda ihari ni uko tugira ngo twubake ubushobozi bw’abasirikare ba Repubulika ya Centrafrique kugira ngo ejo nidufata umwanzuro wo gutaha, babe bafite ubushobozi bwo kwirwanaho mu gihe umwanzi yongeye kubatera.

Hari igihe mwashyizeho ubu butumwa buzarangirira?

Nta gihe gihari kuko ubu nibwo tugitangira gutanga amasomo ya mbere. Kugira ngo twubake ubushobozi bwatuma ingabo zabo zihangana n’ikibazo, bizafata umwanya ariko nta gihe turiha. Ubushobozi buri kubakwa.

Umuvugizi w’Ingabo z’u Rwanda, Brig Gen Ronald Rwivanga, yasobanuye ko ubuzima bwahindutse kuva RDF yagera muri Centrafrique ku masezerano y’ibihugu byombi

Urebye uko ibintu bimeze uyu munsi, umuntu yavuga ko ari he hagiteye impungenge?

Nta hantu na hamwe navuga ko hateye ikibazo kuruta ahandi, ikibazo iyo kivutse abasirikare bacu barasubiza.

Nta bwo ushobora kuvuga ko ahantu hose ugiye hashobora kuba hari umutekano 100%, iyo ikibazo kimwe kivutse, ntabwo twavuga ko umutekano uhagaze nabi. Muri rusange umutekano urahari.

Abarwanyi bashakaga gukuraho ubutegetsi mwaba muzi ibyerekezo barimo?

Baratatanye, abitwa Anti-Balaka na Séléka bisa n’aho bose bagiye batatanira hirya no hino. Ubu gahunda ihari ni ukubashakisha aho bari hose bakabaka intwaro zabo. Iyo gahunda iriho.

Leave a Reply

Your email address will not be published. Required fields are marked *